Küp qəbirin uzunluğu 1metr 80 sm, diamteri- 1metr 20 sm-dir. Küp qəbirdən 1 ədəd sol yanı üstə yarı bükülü vəziyyətdə dəfn edilmiş, böyük insana məxsus skelet aşkar edildi. İnsan skeletinin boğaz hissəsindən gümüş sikkə aşkar edildi. Belə ki, o dəfn edilərkən ağzına sikkə qoyulmuşdur. Düşünürük ki, küp qəbirdə dəfn edilən kişi olmuşdur. Küp qəbirin yanından bir ədəd iri həcmli, kupə tipli saxsı qab, bir ədəd isə vaza tipli saxsı qab aşkar edildi. Qəbrin içərisindən bir ədəd süddan biçimli bardaq, bir ədəd isə kasa formalı saxsı qab, 1 ədəd dəmir qılınc, 1 ədəd isə dəmir xəncər, tunc toqqa başlığı, tunc toqqabənd, qaşlı tunc üzük, tunc piləklər, kauri muncuqlar, kiçik buynuzlu heyvanın aşıqlıq sümüyündən hazırlanmış asma və s. aşkar edildi. Qılıncın uzunluğu 80 sm, eni 6,5 sm, xəncərin uzunluğu isə 30 sm, eni 4 sm-dir.